ಇದು ಅಂತ್ಯವಲ್ಲ, ಒಂದು ಚಿಂತನೆಯ ಅಮರತ್ವದ ಆರಂಭ : ಬ್ರಹ್ಮಶ್ರೀ ನಾರಾಯಣ ಗುರುಗಳು

ಬ್ರಹ್ಮಶ್ರೀ ನಾರಾಯಣ ಗುರುಗಳು – ಸಮಾಧಿ ದಿನದ ಪ್ರಯುಕ್ತ ವಿಶೇಷ ಲೇಖನ.

ಇದು ಅಂತ್ಯವಲ್ಲ, ಒಂದು ಚಿಂತನೆಯ ಅಮರತ್ವದ ಆರಂಭ :

ಕೇರಳದ ಇತಿಹಾಸದಲ್ಲಿ ಸರ್ಕಾರಿ ರಜೆಗಳನ್ನು ತನ್ನ ಜನ್ಮಕ್ಕೂ ಮತ್ತು ನಿರ್ಗಮನಕ್ಕೂ ಪಡೆದ ಏಕೈಕ ಮಹಾಪುರುಷರೆಂದರೆ ಬ್ರಹ್ಮಶ್ರೀ ನಾರಾಯಣ ಗುರುಗಳು. ಸೆಪ್ಟೆಂಬರ್ 20, 1928, ಮಲಯಾಳಂ ಕನ್ನಿ ಮಾಸದ 5ನೇ ದಿನ, ಶಿವಗಿರಿಯ ಪವಿತ್ರ ನೆಲದಲ್ಲಿ ಅವರು ಧ್ಯಾನಸ್ಥ ಸ್ಥಿತಿಯಲ್ಲೇ ಮಹಾಸಮಾಧಿ ಹೊಂದಿದರು.ಈ ದಿನವನ್ನು ನಾವು ಸಾವಿನ ದಿನವಾಗಿ ನೆನೆಯುವುದಿಲ್ಲ. ಅವರು ಹಚ್ಚಿದ ಸಮಾನತೆಯ ಜ್ಞಾನದ ದೀಪ ಇಂದಿಗೂ ಎಷ್ಟು ಬೆಳಗುತ್ತಿದೆ ಎಂದು ನಮ್ಮನ್ನು ನಾವು ಪರೀಕ್ಷಿಸಿಕೊಳ್ಳುವ ದಿನವಾಗಿ ಆಚರಿಸುತ್ತೇವೆ.

1. ನಾಣು ಎಂಬ ಬಾಲಕನು ವಿಶ್ವಗುರುವಾದ ಕಥೆ1855 ಆಗಸ್ಟ್ 28, ತಿರುವನಂತಪುರದ ಚೆಂಪಳಂತಿ. ಈಳವ ಸಮುದಾಯದ ಸಾಮಾನ್ಯ ಕುಟುಂಬದಲ್ಲಿ ನಾಣು ಜನಿಸಿದಾಗ ಕೇರಳ ಜಾತಿ ಪದ್ಧತಿಯ ವಿಷವರ್ತುಲದಲ್ಲಿ ನರಳುತ್ತಿತ್ತು. ದೇವಸ್ಥಾನದ ದಾರಿಯಲ್ಲಿ ನಡೆಯುವುದೂ ಕೆಳವರ್ಗದವರಿಗೆ ನಿಷಿದ್ಧವಾಗಿತ್ತು.ಗುರುಗಳಾದ ಅಯ್ಯಾವು ಸ್ವಾಮಿಕಲ್ ರಿಂದ ಯೋಗ, ಸಂಸ್ಕೃತ ಕಲಿತ ನಾಣು, 8 ವರ್ಷಗಳ ಕಾಲ ಮರುತ್ವಾಮಲೈ ಬೆಟ್ಟದಲ್ಲಿ ತೀವ್ರ ತಪಸ್ಸು ಮಾಡಿದರು. ಅಲ್ಲಿ ಅವರಿಗೆ ಅರಿವಾದ ಸತ್ಯ – ಮೋಕ್ಷವು ಗುಹೆಯಲ್ಲಿಲ್ಲ, ಜನರ ನೋವಿನ ನಡುವೆಯೇ ಇದೆ ಎಂದು.

1888ರ ಅರುವಿಪುರಂ ಕ್ರಾಂತಿ:

ಗುರುಗಳು ಶಿವಲಿಂಗ ಪ್ರತಿಷ್ಠಾಪಿಸಿದರು. ಸವರ್ಣೀಯರು ಪ್ರಶ್ನಿಸಿದರು – “ಈಳವನು ಶಿವನನ್ನು ಪ್ರತಿಷ್ಠಾಪಿಸಲು ಹೇಗೆ ಸಾಧ್ಯ?” ಅದಕ್ಕೆ ಗುರುಗಳು ಸಿಡಿಲಿನಂತೆ ಉತ್ತರಿಸಿದರು :

“ನಾನು ಪ್ರತಿಷ್ಠಾಪಿಸಿದ್ದು ಈಳವ ಶಿವನಲ್ಲ, ಶಿವನನ್ನೇ”ದೇವರ ಮೇಲಿನ ಒಂದು ಜಾತಿಯ ಏಕಸ್ವಾಮ್ಯವನ್ನು ಒಡೆದ ಮೊದಲ ಸುತ್ತಿಗೆಯೇಟು ಇದು. 2. ಗುರುಗಳ ಮೂರು ಮಹಾ ಆಯುಧಗಳುಅ) ಒಂದು ಜಾತಿ, ಒಂದು ಮತ, ಒಂದು ದೇವರು ಮನುಷ್ಯನಿಗೆ: Oru Jathi, Oru Matham, Oru Daivam Manushyanu` ಇದು ಕೇವಲ ಘೋಷವಾಕ್ಯವಲ್ಲ. ಆದಿ ಶಂಕರರ ಅದ್ವೈತ ತತ್ವವಾದ “ಬ್ರಹ್ಮ ಸತ್ಯ, ಜಗನ್ಮಿಥ್ಯಾ”ವನ್ನು ಗುರುಗಳು ಸಾಮಾಜಿಕವಾಗಿ ಅನುವಾದಿಸಿದರು – “ದೇವರು ಒಂದೇ ಇರುವಾಗ, ಮನುಷ್ಯರಲ್ಲಿ ಜಾತಿ ಹೇಗೆ ಬಂತು?”

ಆ) ವಿದ್ಯೆಯಿಂದ ಸ್ವತಂತ್ರರಾಗಿ, ಸಂಘಟನೆಯಿಂದ ಬಲಯುತರಾಗಿ: ದೇವಸ್ಥಾನ ಕಟ್ಟುವುದಕ್ಕಿಂತ ಮೊದಲು ಶಾಲೆ ಕಟ್ಟಿ ಎಂದವರು ಅವರು. 1904ರಲ್ಲಿ ಜಾತಿ ನೋಡದೆ ಬಡ ಮಕ್ಕಳಿಗಾಗಿ ಶಾಲೆ ತೆರೆದರು. ಶಿಕ್ಷಣವೇ ನಿಜವಾದ ವಿಮೋಚನೆ ಎಂದು ಸಾರಿದರು.ಇ) ದೇವಸ್ಥಾನಗಳು ವಿವೇಕದ ಕೇಂದ್ರಗಳಾಗಲಿ:ಅವರು ಕಟ್ಟಿದ 40ಕ್ಕೂ ಹೆಚ್ಚು ದೇವಸ್ಥಾನಗಳಲ್ಲಿ ಸಂಸ್ಕೃತ ಮಂತ್ರದ ಬದಲು ಮಲಯಾಳಂ ಪ್ರಾರ್ಥನೆ, ಪೂಜೆಯ ಜೊತೆಗೆ ಗ್ರಂಥಾಲಯ, ಶಾಲೆ, ಕೃಷಿ ತರಬೇತಿ ಕೇಂದ್ರಗಳು ಇರಬೇಕೆಂದು ಕನಸು ಕಂಡರು. 1924ರಲ್ಲಿ ಅವರು ಆರಂಭಿಸಿದ ಶಿವಗಿರಿ ತೀರ್ಥಯಾತ್ರೆಯ ಉದ್ದೇಶವೇ – ಶುಚಿತ್ವ, ಶಿಕ್ಷಣ, ಭಕ್ತಿ, ಕೃಷಿ, ಕೈಗಾರಿಕೆ ಮತ್ತು ವ್ಯಾಪಾರವನ್ನು ಕಲಿಯುವುದು. 3. ಇಂದಿಗೂ ಪ್ರಸ್ತುತವಾಗಿರುವ ಗುರು ವಾಣಿಗುರುಗಳು ರಚಿಸಿದ `ದೈವ ದಶಕಂ` 10 ಶ್ಲೋಕಗಳ ಪ್ರಾರ್ಥನೆ ಇಂದು 100ಕ್ಕೂ ಹೆಚ್ಚು ಭಾಷೆಗಳಿಗೆ ಅನುವಾದವಾಗಿದೆ. ಮಹಾತ್ಮ ಗಾಂಧೀಜಿ, ರವೀಂದ್ರನಾಥ ಟ್ಯಾಗೋರರಂತಹ ಮಹನೀಯರೇ ಶಿವಗಿರಿಗೆ ಬಂದು ಗುರುಗಳ ದರ್ಶನ ಪಡೆದಿದ್ದಾರೆ.ಜಾತಿ, ಧರ್ಮದ ಹೆಸರಿನಲ್ಲಿ ನಾವು ಮತ್ತೆ ಗೋಡೆ ಕಟ್ಟುತ್ತಿರುವ ಈ ಹೊತ್ತಿನಲ್ಲಿ, ಅವರ ಈ ಮಾತು ನಮ್ಮ ಕಿವಿಯಲ್ಲಿ ಗುಡಬೇಕು:”ಮತವೆಂಬುದು ಯಾವುದೇ ಇರಲಿ, ಮನುಷ್ಯನು ಒಳ್ಳೆಯವನಾಗಲಿ”

4. ನಾವು ಇರುವಲ್ಲೇ ಈ ದಿನವನ್ನು ಸರಳವಾಗಿ ಹೇಗೆ ಆಚರಿಸಬಹುದು?ಸಮಾಧಿ ದಿನದ ಆಚರಣೆ ಎಂದರೆ ದೊಡ್ಡ ವೇದಿಕೆ, ಹೂಮಾಲೆ ಮಾತ್ರವಲ್ಲ. ಗುರುಗಳ ತತ್ವವನ್ನು ಒಂದು ದಿನವಾದರೂ ಬದುಕುವುದು.1. ಮನೆಯಲ್ಲಿ 10 ನಿಮಿಷದ ಪ್ರಾರ್ಥನೆ: ಸಂಜೆ ದೀಪ ಹಚ್ಚಿ ಕುಟುಂಬದವರೆಲ್ಲಾ ಸೇರಿ `ದೈವ ದಶಕಂ` ಅಥವಾ “ಒಂದು ಜಾತಿ, ಒಂದು ಮತ” ಪ್ರಾರ್ಥನೆಯನ್ನು ಹೇಳಿ. ಮಕ್ಕಳಿಗೆ ಅರುವಿಪುರಂ ಕಥೆಯನ್ನು ಹೇಳಿ.2. ವಿದ್ಯಾ ದಾನ: ಗುರುಗಳು ಶಿಕ್ಷಣಕ್ಕೆ ಹೆಚ್ಚು ಒತ್ತು ಕೊಟ್ಟವರು.

ನಿಮ್ಮ ಹತ್ತಿರದ ಬಡ ವಿದ್ಯಾರ್ಥಿಗೆ ಒಂದು ಪುಸ್ತಕ, ಪೆನ್ನು ಕೊಡಿ. ಇದೇ ಗುರುಗಳಿಗೆ ನಿಜವಾದ ನಮನ.3. ಶುಚಿತ್ವ ಸೇವೆ: ಗುರುಗಳು ಶಿವಗಿರಿ ಯಾತ್ರೆಯಲ್ಲಿ ಮೊದಲು ಶುಚಿತ್ವಕ್ಕೆ ಆದ್ಯತೆ ಕೊಟ್ಟರು. ನಮ್ಮ ಮನೆ, ಬೀದಿ, ಹತ್ತಿರದ ದೇವಸ್ಥಾನದ ಆವರಣವನ್ನು 30 ನಿಮಿಷ ಸ್ವಚ್ಛಗೊಳಿಸಿ.4. ಸಮಪಂಕ್ತಿ ಭೋಜನ:ಆ ದಿನ ಜಾತಿ, ಸ್ಥಾನಮಾನ ನೋಡದೆ ಎಲ್ಲರೊಂದಿಗೆ ಒಟ್ಟಿಗೆ ಕುಳಿತು ಊಟ ಮಾಡಿ. ಕೆಲಸದ ಸ್ಥಳದಲ್ಲಿ ಎಲ್ಲರನ್ನೂ ಸಮಾನವಾಗಿ ಗೌರವಿಸಿ. “ನಾವು ಮನುಷ್ಯರನ್ನು ಮನುಷ್ಯರಾಗಿ ನೋಡುತ್ತೇವೆಯೇ?” ಎಂದು ಪ್ರಶ್ನಿಸಿಕೊಳ್ಳಿ.

ಗುರುಗಳ ಸಮಾಧಿ ಎಂದರೆ ಅಂತ್ಯವಲ್ಲ. ಅದು ಸಮಾನತೆಯ ನಿರಂತರ ಜಾಗೃತಿ.